Oté

« I yèm aplati a dovan désèrtin épi abess d’ot dann mèm tan ! »

In kozman pou la rout

Justin / 24 mars 2020

JPEG - 43.6 ko

Mésyé, Médam, La Sosyété, koz èk moin sé koz èk in kouyon mé sé o pyé d’lo mir k’i oi lo mason. Mé zami, fransh vérité, kozman moin la mark an-o la li pé pa rovandik son tit proverb pars sé in sinp konstatasyon moin la fé dopi lontan, mi fé ankor zordi, é moin lé sir m’a rofé domin si lo gran timonyé d’la vi i pèrmète amoin viv ankor in pé d’tan… Mon bann konpatriyot néna la jalouzri shoviyé dann kor é zot i pans i fé souvan défoi plis in ka avèk lé zot k’avèk zot. Pétète pars zot i koné mète azot pla vant dovan demoun étranj mé zot i yèm bien kan demoun isi i aplati dovan zot… Dizon nou na souvan afèr avèk désèrtin kolonizé kolonizatèr. Konbien foi moin la romark demoun la droite apré aplafi azot dovan in minis gouvèrman fransé é lété pa lo ka mon bann kamard rouj-de-fon. An touléka, sé sak moin la vi, sak mi oi ankor é sak moin va oir domin si lo gran timonyé d’la vi i lèss amoin trafik ankor in pé dsi la tèr. Alé ! Mi kite azot rofléshi la dsi é ni artrouv pli d’van. Sipétadyé.