Mézami kan nou lété pti, mi rapèl bien, mon matant Didi kan èl téi vien pou vèye anou téi di souvan : é bann ti kouyon zoué pa avèk dofé sa va bril azot. Poitan l’ariv amoin konm mon bann frèr é mon pti sèr, kan nout min téi grate alé zoué avèk dofé. Kisoi, tazantan pou fé pète pétar, kisoi pou mète sigarète dann la bèk kamaléon pou fé touf azot sir plas, kisoi pou alime in fé pti boi pars sa té in n’afèr téi plé anou. I paré téi plé pa nou tousèl é lo gran Néron li mèm kan li la fé fou d’fé dann la vil Rome, i paré li téi di : sa lé gayar ! lo gayar té linsandi la vil… Astèr lo fé i pé pa zète lo fé, i pé zète kékshoz danzéré é mi souvien bien nou té i yèm bien zoué bann zé danzéré. Alé ! Mon bann zami, zoué pa avèk dofé pars souvan défoi lo rézilta la pa sak zot i kroi. Mi lèss azot rofléshi la dsi é ni artrouv pli d’van. Sipétadyé.