Dabor pou bann propriyétèr mwin la vi ké la plipar sé bann milyardèr é lé pa étonan si zot i défann pa lo poinnvizé bann travayèr mé sète lo patrona-an fézan sanblan zot lé inparssyal — Pou zot kan néna in manifèstassion kont gouvèrnman d’droite néna tré pé d’moune pou manifèsté. Souvan défoi zot i done lo lévaliassion la poliss é kan sé la poliss é ké lo gouvèrnman lé a droite wi pé ète sir é sèrtin lo nonm demoune lé divizé par dë.

Astèr pou bann zanimatèr védète épi bann gran zoinaliss, zot lé pa péyé avèk in lanss-pyèr mé avèk bèl-bèl shèke si tèlman mwin lé toultan a domandé kèl koz zot i défann é pou ki oziss zot i pran parti… D’apré mwin san z’ète inzist par rapor azot, mi diré la plipar d’tan zot i maryé avèk l’idéolozi dominante, sète zot i fabrik zot mèm épi sète i suiv lo kouran bann zidé réakssyonèr.

Mwin néna in kamarad kominiss é li di amwin touzour li rogarde a titré bann télé réaksyonèr mé li rèss kominiss. Souvan mi di ali sa i doizète difissil pars zamé bann télé-la va pran fé é koz pou nout bnnn zidé pars o fon zot mèm zot lé anti-kominiss é zot i rèv in sèl zafèr sé d’kraz anou. Mé son zyé lé a li, alor si mi pe dir in n’afèr mi di mé san k’sa i shanj son zidé — son manyèr oir lé shoz..

O fète pou kossa mi di azot sa ? Pars pou mwin néna bann zidé dominante é a l’èr ki lé lidéolozi dominante èl lé anti-kominiss é ni vé ni vé pa, zot i prétan zot lé obzéktif, mé o fon zot lé mèm konpliss avèk lidéolozi dominante. Koman konbate la klass dominante si ni épouz son bann zidé épi son lidéolozi ? Mi oi lé dir, sof si ni komanss par konbate lidéolozi dominante donk si ni pran son kontropyé.

A bon antandèr salu !

Justin