Oté

II - Nout lonbri lé antéré issi

Alé Québec :

Justin / 16 novanm 2007

Lé bien vré, bann jènn i sava la-ba Québec an promyé pou rod in bon formasion, épi pou trouv in travay a-titré kan lékol la fini. Oui, sa lé bien vré, épi sak la fine konète shomaz va konprann amoin kan mi di an aoir in formasion, in métié, épi pa trouv travay sé konm demoun i gingn in déprésion, épi zot i koné pi kossa i fo fé... Sak la pa konète shomaz i pé pa konprann pou vréman kèl kalité déga sa i fé dann kèr, dan la tète, épi dann kor in moun !

Sa lé bien vré, solman kan i sava Québec, i doi mazine sa lé pou in koup dé tan. Dann son kèr, daoir lo moun i di : in zour, tardra-viendra, m’a rotourn mon péi, so pti galé dann loséan indien, épi si la pa la-ba, sar pa tro loin, konmsa m’a gingn alé oir mon famiy, manz in pé manzé momon, konète ankor la sézon létshi, anbras mon vié famiy avan i fèrm lo zié.

Fransh vérité, la mobilité i doi pa ète légzil : sa i doi ète in manièr bien form bann jènn, konmsa zot lé bien itil pou lo péi, épi pou la rézion ni viv kan zot va rotourné. Konmsa mi konpran la mobilité, pa konm in BIMIDOM bis. Akoz, sé issi nout lonbri lé antéré ! Sa i kont sa, dan la vi in moun !

Justin