L’Insee i vienn dir ankor nana plis san mil ilétré La Rénion, mèm pétète san vin mil ! Dépi kék zané, i déklar mèm shif. Dépi kék zané lo shif i débouz pa. Si i fé lo kalkil par rapor nout popilasion, sa i vé dir nana in lilétré déssi uit pèrsone an az pou bien konèt lir. Bayoun ! Inn, déssi uit pèrsone !

Moin la parti déssi karé piéton Sinni, épi moin la komans konté, moun par moun. Inn, dé, troi, sis, tèt, uit... A non, la pa bon la ! Uitièm moun sé in pti mamzèl, lo rin i tourn konm la mèr guèp, rébane déssi lo zié... Non, moin la mal tonbé, moin-la ! Moin lé sir sa i koné bien lir ! Mi kontinié : inn, dé, troi, sis, sèt, uit. La pa bon ! So foi issi, mi tonm déssi in moun l’apré koz « je, tu, toi, tu, me, toi ». Moun-la i doi konète bien lir, sa !

Alor, koman i fé pou trouv shif-la ? I fé sondaz ? I trouv in léshantiyon signifikatif ? Déssi, in n’afèr konm lilétrism ? Dizon, solman sa i doi z’ète difisil pou fé sa. Touléka, la pa bien briyan pou in péi nana lékol avèk z’amontrèr in pé partou... Épi, sof mon réspé, mi oi pa in gran plan pou fé rokil so tablatir-la.

Poitan, dann nout sosiété, si ou lé ilétré, sé konm si ou lé andikapé. É san vin mil andikapé konmsa, sa i fé plisk’in bon pé. Alor, moin mi trouv,i fo bouz in pé !

Justin