Tazantan nana in buzz la-dsi. Dsi kosa ? Dsi bann shomèr i rode pa travaye. Nana mèm in sondaz I di dé tyèr d’moun i pans si bann shomèr té i rode travaye pou vréman noré moins dann shomaz. L’èrla, gouvèrnman sosyalis, in sèrtin Valls té lo shèf, nana in an édmi la déside anploiye in bann kontrolèr pou fé arète in éskandal konmsa.

A bon ! Alor ou i tiliz out lasédik pou alé bate karé, rant dann bann gran lotèl, alé a droit, alé a gosh, proméné vèy pa koman. Nou va oir ! Nou va oir ! Nou va oir ! Sak nou va oir !

Dopi in an édmi, la kontrolé, la kontrolé, a mor mi di azot ! La i sa débiské la ! Ala lo rézilta, i sort tonbé… Rézilta : katrovin sis pour san bann shomèr i fé pa sanblan rode travaye, mé i rode pou vréman é in pé i trouv, in pé i trouv pa. Mé pou rodé zot i rode.

Antansyon i rès kant mèm katorz pour san é banna lété radyé. Donk nana in bann frodèr kant mèm sof ké la moityé i toush pa lo sédik é la plipar d’tan i fé bann ti boulo pou pa tro tir lo dyab par la ké. In pti sipléman si zot i vé é sirman pa in moiyin grosi pou vréman z’ot pla. Donk i rès sète pour san d’moun : sète mound si san ! Konm mi di souvan dé foi la poin do koi kass lo kate pate in kanar.

Astèr, gouvèrnman i di i fo kontol ankor plis. Kontrol ankor plis pou trap lo mèm rézilta ? Ala in plan d’aksyon i ansèrv kékshoz… Kékshoz i pouré donn lo nom, la po patate.I ansèrv pou la po patate.