Mi koné pa si zot la byin rogard bann moun apré fé z’ot komisyon dann gran sirfas, koméla : sak mi oi, sé k’ demoun i pran prékosyon, i fé byin antansyon pou sèy ashté moin shèr, konm si zot l’apré rode in manyèr pou ariv ziska la fin n’lo moi èk z’ot ti-moné.
I diré manyèr demoun la shanjé, pars zot lé pi konsomatèr an fou-fou, zot i mazine zot sé in bann konsomatèr malin !

Solman, moin l’apré domann amoin si bann gran sosyété i roul pa zot kant mèm dan la farine, si par égzanp, plito k’fé konkirans an vré inn-èk-l’ot, zot i pas pa z’ot tan po fé lantant déssi l’do bann konsomatèr. In sort lantant ilisit.
Byin sir, mi di sa mé san an avoir la prèv pou vréman, pars i oi pa lo pri l’ashté, lo pri transpor, l’oktroi d’mèr la péyé si la péyé... I oi aryink lo pri bann kliyan i doi péyé.

Mé akoz lo pri marshandiz dann gran komèrs, épi dann in n’ot, épi dann in troizyinm lé près parèy ? I shanj soman inn-dé santime.
Pou moin, l’ashté mèm pri, mèm landroi, la pèy mèm taks, mèm transpor…, donk lo pri k’i vann sé topèt-morèt...
Oté ! Na poin inn pli malin ké l’ot, la poin inn i fé in méyèr l’opérasyon, in méyèr éspékilasyon ? Dizon in bann roulèr d’fos, in bann "laron-an-foir" !

Justin