Bann zimèb nèv i pous in pé partou, konm shanpignon apré in gro plui : trouv in lapartman la pa si tèlman difisil, mé sé trouv larzan pou pèy loiyé-la lé pliské difisil.
Plis sisan euro pou in T2, plis sètsan pou in in T3 : si i kalkil an fran sa i fé plis 4000 fran dann in ka, près 5000 dann l’ot ka. Biensir pou boush inpé lo zié, anndan nana in kuizine aménazé, nana shofaz de lo aléktrik, nana klimatizèr, nana plakar, nana parking soman i pèy an plis.

Noré pou di la-dsi, solman zordi m’a di i sèl zafèr : mi trouv pa korèk i obliz pa bann promotèr aport zot grain n’sèl dsi la késtion nout plan pou lénèrzi. Akoz dann règléman l’irbanism la poin in lobligasion ékip limèb konm in pti lizine éléktrik pèrsonèl avèk bann plak fotovoltaîk épi bann lélis pou lénérzi lo van. Biendéka, na mèm poin shof dlo solèr.

Alor, mon romark : lé vré nout sistèm lé konm li lé, kalkilé pou raport larzan, mé kissa i pé modifié bann règloman, sé bann pouvoir piblik. Lé préssé, i fo rann nout plan lénèrzi obligatoir. Sansa apré, kan va fé lo kont, va di, i mank tann kilowat : zis sak bann nouvo batiman nora produi. Va di, ala ankor in bann lokazion manké.

Justin