Bann moune –la ni pé apèl azot bann milyardèr sansa arshi-milyardèr. Néna mèm in pé i fé parti déssèrtin gouvèrnman konm gouvèrnman zétazinien néna parétil in paké d’moune lé milyardèr ladan si tèlman bann zoinalist i apèl pi zot bann gouvèrnan mé bann zom d’afèr konm lo Prézidan li mèm Méssyé Trump é li lé pa toussèl.

Néna in moune i apèl Musk ébin se musk-la lé sharjé diminyé bann dépanss lo gouvèrnman fédéral é pou sa li mète demoune par santène, par milyé, par dizène milyé déor ébin bononm-la, i paré li toussèl li lé pli rish in péi i apèl La finlande é sépa si zot i rapèl momandoné li pèrsonèl li té i ékipe l’armé l’Ikrène dann son guèr konte La Rissi. Son rishèss pèrsonèl lé rante troisan épi kat san milyar dolar.

Néna bann zoinal éspéssyal pou anparl bann milyardèr é d’apré sak mwin la lir si i pran lo vin pli gro milyardèr ébin arienk zot néna pliss larzan ké la plipar bann péi sof lé Zétazini, La Chine, Japon, pétète lalmagn épi l’Ind biento. Sé dir azot si bann milyardèr-la na pwin lo moiyin pou komann lo monde antouléka kissa i di zot i vé pa fé é amenn ali an sharète shaviré.

Mwin pèrsonèlman mi oi ladan pa granshoz étonan pars opliss i sava, opliss sé lo kapital ké lé bien réminéré é pa lo travaye. Si tèlman ké momandoné étone pa si dann plizyèr péi bann milyardèr la fine pran la démokrassi an otaj é zot i kash mèm pi azot-lo dyab an parmi l’moune i kash son keu mé zot, mèm pa. Zot i fé oir sa fyèrman.

Mézami, fransh vérité, mi panss i fo sa i fé rofléshir anou pars ni oi bien k ékshoz konmsa i pé pa kontinyé.In bon révolissyon i sanm amwin bien néssésèr dsi lo plan mondyal… A bon antandèr salu !