Kisa i pé ésplik anou koman in boutèy lo gaz i rant moin sèt éro La Rényon, i arvann vin éro dann léstasyon ?
Kisa i pé dir anou pou kosa lo pri lo blé la béssé dann sak i apèl lo kour mondyal, épi la farine, lo pri la goumanté, épi do pin ? Parl pi gato, parl pi bonbon…
Zot i pé dir a nou pou kosa luil lo pri la goumanté ? Lo pri do ri galman, épi lo pri bann marshandiz lo pli nésésèr ?

In pé i vé fé kroir a nou, sé par rapor lé sharj, lo transpor, loktroi d’mèr, linpo, étsétéri-étsétéra… Mé sa sé la krak, sa sé kalkil mantèr, la pintir l’apré pass anou !
É zot i voudré ni gob sa konm krapo i souk moush-a-myèl, konm lézar i gob moush, konm zirondèl dan lé z’èr i manz tout kalité zinsèk volan a la vol… ?
Asé, arète in kou, nou lé fatigué pran blan pou noir, savon pou fromaz koko d’mor… !

I prétan dir bann nana lo pourkoi i vé la pé sosyal ! La pé sosyal, sansa kontinyé ésploite anou an dous é san sokous ?
La-ba, la Martinik épi la Gwadloup, i apèl sistèm kolonyal-la "profitaz", sansa "profitasyon" ; issi, ni pé donn sistèm lésploitasyon-la lo non "anprofitaz", sansa "anprofitasyon".
Bou di kont, in bann mo pou dir lo mèm zafèr ni gingn pi siporté !

Justin