Lé sir ké kan léta i assime pa son rol, é kan la sékirité lé pa assiré, demoune i dégaz la plass — i di lo ra i kite lo bato kan néna in tanpète. E késtyonn tanpète i pé dir laba Mayotte zot lé bien sèrvi dopi in bon koup de tan… Koman mi diré sa ? Mi diré poisson i pouri par la tète é konm zot i koné la tète lé pa Mayotte, èl lé laba Paris.

Figuir azot pou ésplik so drol de zafèr néna plizyèr rézon : dabor néna fonkssyonèr i fé la pèye konm zot i sorte La franss zot la pi roparti Mayotte épi konm sak la ranplassé i koné pa fé lo travaye ébin zot la pa fé é sé pou sa in bonpé zanségnan an cdd lé pa péyé.

Astèr lo parti d’Lepen i di zot pèyman i fé dopi la Rényon é sa i marsh pa non pli. Mi panss pa lé vré mé si lé vré ladministrassion franssèz néna drol zidé é mi trouv drol la fasson bann problèm lé zéré : pou la prizon i fo vni La Rényon, pou la santé néna la plass lopital La Rényon, astèr lo pèyman bann zamontrèr i pass par La Rényon. Lé ga Mayotte lé sou titèl La Rényon sa ? Lé pa possib ké bonpé sèrviss inportan i pass par issi konmsa.

Talèr sé La Rényon k’lé shoz va flanshé !!!!

Mwin la pa bézwin dir sak mi panss dsi la fasson La franss la mète la min dsi Mayotte l’ané 1974-1975 mé kan l’éta i fé in lopérassion d’bandi konmsa o mwin li assir ali ké li mète lo moiyin é lo moiyin lé pa la.

A bon antandèr salu !

Justin