Dann tan Paul Vergès lété prézidan la réjyon é Villepin lété promyé minis, toulédé la diskite zakor Matignon. In diskissyon séré vèy pa. Mé, koman-koman la nyabou signé é La Rényon la gingn milyar pou ède fé lo tram-train épi in nouvèl route litoral. Sa té in vré shans pou nou. Zot i koné prézidan la réjyon la shanjé. La politik La Frans, déssi la késtyonn lékonomi la shanjé ossi pou sèy anpar la kriz. Donk lété possib manévré pou gingn in bon moné an plis, é gouvèrnman l’avé poin aryin pou rofiz boug-la... Ay-ay-ay ! Zordi, olèrk domann plis... olèrk profite lokazyon pou gingn plis larzan pou nout réjyon, ala k’in prézidan larguèr d’ kor, i domann moins.

Akout sa pou sak i kroi pa ! Dann zakor Matignon lété prévi aktyaliz lo larzan pou la route litoral. Zordi, mèm route i doi koute prèss in milyar sink san milyon l’éro, donk gouvèrnman i rèss a devoir anou in domi-milyar an plis par raport lo kalkil l’avé fé dann tan zakor Matignon. Sé sa k’gouvèrnman i doi donn anou an plis. Sak li doi ! Pa in éro an plis, pa in éro an moins. Konm lété prévi !... Lo nouvo prézidan la réjyon la déside blagboul lo tram-train épi vire lo kat san sinkante milyon l’État té i doi doné déssi la route litoral. Donk li lèss pou gouvèrnman lo domi-milyar sète-la li doi anou pou la route litoral... Sa sé in roiyal kado ! Fillon, épi Sarkozy la byin konprann in n’afèr konmsa, é la tape dan la min Didier Robert : "Dakor ! Bon pou sa mèm !". Zot la pa marmay lékol é Didier Robert in zanfan tann koté zot. Donk, pou romèrsyé lo Didier, zot l’amène ali dann in kongré dan la vil Nice... In bate karé k’i fini par koute anou kat san sinkante milyon l’ero, kaziman in domi-milyar. For, for, pliské for !*

Justin

*Sépa si la-ba dan la vil Nice, Didier Robert la kroiz lo tramway ? Si li la pa boush son zyé li la di oir koman sa lé zoli. .