La Franss la roganiz in référandome pou konète si bann komorien té i vote pou zot lindépandanss-pou konète si bann zabitan La grande Komor, Anjouan, Mohéli épi Mayotte-sa téi form in sèl koloni-, kat zil mé in sèl koloni- téi vé fèr in péi a par. Lo vote la done in gran majorité pou lindépandanss donk an aplikassion lo régloman internassional dsi la dékolonizassion l’ONU l’avé adopté La Franss noré du prolklam lindépandanss bannzil komor.

Mé wala sa la pa pass konmsa pars Mayotte ofisyèlman la vote konte lindépandanss. Alor la franss la sépar Mayotte avèk bannzil. La Répiblik komor i di La franss i okip a tor son téritoir é La Franss i di Mayotte i fé parti d’son lansanm pars lo pèp laba la touzour vote konte lindépandanss. Ni pé arète la pou lo sobatkoz an droi internassyonal.

Biensir konm lo provèrb i di : « Sak lé pèrmi pou in bèf lé pa pèrmi pou in zèf » é sé konmsa lo gro i manz lo pti.I fo dir dopi sinkante zané la sityassion lé konm èl i lé é lé pa di ké li va boujé in jour… Sirtou dopi ké méssyé Macron étan Prézidan son linstin guèrrié épi kolonyalist la pran lo déssu par rapor lo mèm téi di sak la vni avan li la fé in lérèr dsi la késtyonn Mayotte.

Dopi sé dèrnyé tan la sityassion i bouz dann loséan indien é noute rèv oir in zone de pé dann loséan pou linstan i éloign in pé.. Si tèlman ké La franss i vé instal in baz militèr dann Mayotte si tèlman lo gouvèrnman La Répiblik Komor lé pa kontan ditou mé pou linstan lo provèrb mwin la marke an-o la i aplik plin droi…Mé néna in n’ote provèrb i di : « Néna in zour i apèl demin. » é dann so bataye provèrb va oir in zour lokèl va gagné.

Antouléka, ki vivra verra. A bon antan dèr salu !