Médame zé méssyé, la sossyété koz èk mwin sé koz èk in kouyon mé sé o pyé d’lo mir k’i oi lo vré masson .

Mézami mi sorte rogarde dann liv provèrb Alain Nguyen-Le gros* é mèm paz kozman mwin la marke an-o la, mi lir ossi : «  in bienfé lé zamé rékonpanssé  ». In kontradikssyon sé sak mi yèm avèk la kiltir popilèr mon péi.Li di aou blan déssèrtènn foi, mé li ézite pa dir aou «  noir » in n’ote foi . Shakinn i doi débarbote ali avèk bande kozman i sava dann sans kontrèr.

Lé dé lé vré,biensir mé konm i di sé solon, sé suivan lo ka.Néna bonpé ka konmsa é sa sé pou dir anou la vérité na pwin in sèl koulèr é shakinn i doi fé son shoi kan li lé o pyé d’lo mir : kissoi ni kroi Pèrnoèl, kissoi ni kroi Pèrfouétar,kissoi ni kroi blan, kissoi ni kroi noir. Mé shoushoute avèk la mori sa néna in sèl sanss sa ?Lo sanss kékshoz lé bon pou nou.

Alé ! mi lèss azot rofléshi la dsi é ni artrouv pli d’van. Sipétadyé.

*lo tite lo liv"La Réunion singulière et plurielle"