Matante Zélida la ékrir Justin :
Mon shèr nové, mon spès salté, rouj de fon dovan léternité,
Moin lé a d’mandé kosa in pé d’moun nana dan zot koko ! Kan tout demoun i s’anplègn la vi shèr, nana in pé, sanm pou moin, i pans la p’asé, mèt ankor. Mi sipoz, ou i koné a popré kosa mi vé anparlé ? Mi vé anparl lo pri tomat. Tomat lé shèr isi La Rénion dopi in bon koup de tan. L’èr-la, in pé la pans fé vnir tomat Madégaskar, épi zot la vann sa dé foi moin shèr ké tomat La Rénion. Té bien pou d’moun na trou dan la posh ! Ala ké lo mésié Minatchy èk son bann dalon la di zot i vé pa oir sa La Rénion. Zot la parti bat tanbour dsou la fénèt préfé, é préfé la désid défann tomat malgash rantré. Pandan éstan-la, kisa lé frit ? Sé bann pti kolon La Rénion, bann moun la posh lé plat. Touléka, si sé konm sa zot i prétan tir La Rénion dann malizé son l’ékonomi, éskiz amoin, mé la parti lé pa gagné. Tok ! Pran sa pou toi !

Justin la fé pou répons :
Mon vié matant k’i koz touzour la boush rouvèr,
Éskiz mon pardon ! Si ou la antann mésié Minatchy, ou la pa tro bien ékout ali. Kosa li la di ? Li la di, promièrman, nout bann prodiktèr lé an sitiasion d’konkirans déloiyal par rapor Madégaskar : Bann travayèr la-ba lé péyé in pti moné, é isi, sa lé interdi ; donk lo pri d’rovien lé bokou pli fèb shé zot par rapor isi, é nout bann prodiktèr lé riskab déklar fayit.
Dézièm zafèr, li di bann prodiktèr malgash i ansèrv tout kalité produi l’Erop i vé pi k’i ansèrv pars lé pa bon pou la santé. Lé vré, lé pa vré ? Touléka, bann sèrvis konpétan i doi vérifié, mé zot la pa fé. Alor, i mèt an vant san garanti ? An plis ké sa, mi pans in bonpé d’moun i koné dé troi gran sosiété l’apré loué térin dan l’Afrik pou aroz La Rénion avèk bann produi bon marshé èk bann travayèr péyé kou d’lans pièr, san réspèk okin droi dann travay, san réspèk lo règlomann santé.
Donk, plito ké fé bann z’afèr an misouk, i vo mié in bon diskision, èk in bon z’akor, plito ké fé lé z’afèr konm sa an misouk, soi dizan dan l’intéré toulmoun, alé oir la pa vré. Tok ! Pran sa pou ou !

 Justin