Oté

In bon moné pou inn, in pti katsou pou lé z’ot !

Sarkozy épi bann z’AF :

Justin / 12 novanm 2007

Lo prézidan la lèv an sirso. Kossa la fé ? Fiyon, so léspès martin ki kouzi i gingn plis ké moin. Moin lé mèm blizé alé an vakans dan la posh bann moun nana lo pourkoi. Kissa sé lo prézidan ? Ali, amoin ? Alors, I fo trouv in solision toutsuit ! La patri lé an danzé, k’in san ginpir abrèv lo fiyon.
Zistoman, bann dépité la pou diskit déssi lo bidzé. Méyèr lokazion na poin. Parti sé parti ! Propozision, akséptasion. Inn nuite mèm pa lo salèr lo prézidan sort 7.000 éro par-la , trap 18.690 éro. La oui, la i rossanm in prézidan. An passan i miltipliy par 3 lo bidzé l’élizé.
Ouf ! ala In gran linzistis réparé. La Frans la ankor gingn in batay ! Sanfoutsa si i pèrd la guèr apré !
Romark bien, tout la gingn zot rékonpans. Assiréman ! Ziska bann moun i gingn larzan d’lo. Solman in pti mizing pourkoi mèm. I goumant so larzan-la 1 pou san, soloman... Si ou gingn par-la san éro (100 eur), ou va gingn san in (101 eur).Kossa ou sar fé avèk so éro-la, sa mi koné pa.
Sak mi koné, sé k’shakèn i arèst son plas : in bon moné pou inn, in ptikatsou pou lé z’ot - bann nonbré-mizérab.

Justin