Matante Sélida la ékrir Justin :
Mon shèr nové, mon spès salté, mi sar di aou in n’afèr moin lé sir i sar rann aou bandé an ké d’bèf, pars moin la fine romark azot, bann rouj de fon, zot i èm pa i di la vérité dessu bann jènn. Zot i èm pa i di nana i bonpé dan la bann lé a tou fèr : lé pa réspéktieu bann vié moun, lé parès konm le shien na le pus, épi si ou la bate le zieu, zot i tir malol ! Sa i vé dir, zot lé paré pou gingn in n’afèr san forsé, é kont pa déssi mèrsi : mèrsi lé mor sou pié zavoka ! Pran sa pou toi !

Justin la fé aèl pou répons :
Mon vié Matant, mi oi konm dabitid ou i aboy avèk lo shien son mètr lé mor ! Si dann out lantouraz i kritik la jénès, ou i kritik la jénès ossi. Si dann out lantouraj i donn bann jènn tout péshé, ou ossi dann ta... Ou i konpran pa bann jènn lé fatigué avèk tout se kritikasion, lé pa bien dann kostime in pé i tay pou zot ! Ou i konpran pa si na in grin bébé dann panié mayi, la pa pou sa k’sé in panié grinn bébé !
Épi, jènn, gran moun, vié moun, nana sak lé valab, nana sak lé insignifian. La pa in késtionn laz, sé in késtionn kalité ! In bon moun sé in bon moun : vié li ! Zènn li ! Mèm marmay li ! In moun insignifian, sé in moun insignifian : vié, li ! Zènn, li ! Marmay li ! Gramoun li !

Justin