Mon matante Zélida la anvoy amoin in lète pou di amoin konmsa :
Mon shèr nové,
Mi pran ma plime pou dir a ou konm de koi mi èm bien lo prézidan Sarkozy mèm si in pé d’malfondé i di konmsa li lé konm in kabo sotèr. Mi èm moin son dézièm fanm akoz avan, èl té bien blansh épi éstèr, banna i di : « Karla la brini ». Lé domaz akoz lo prézidan, li, li nana la koulèr.

Mon nové, i prétan vi ékrir dann in zournal i èm arienk malparlé, mé zordi, moin nana in nouvèl pou boush out také : lo prézidan la kal bann dépité pou la késtionn’linpo télé. Li la di pou sète ané i pèyra pa, solman lané proshène va péyé, épi i gingn ar pa dégrévé.
Alor, kossa vi di d’sa ? Dizon in zo la pass an travèr dann vot gozié !

Alé, mon shèr nové, nou va rotrouvé : anbrass bien Justine épi tout lo bann ti-krime nana dann vot mézon.
FPMB (fèrmé par mil baisers, sète Jida an parmi)

A oui, pou in bone nouvèl, sé in bone nouvèl : tout bann moun i pèy pa so linpo-la, lané proshène va plish azot. Matante, si moin téi doi pa ou lo réspé, akoz ou sé in vié dinozor, moin noré di aou, i rossanm ou la tié kouyon pou vol son tour.

 Justin