Yèr matin, kossa mi antan dann radio ? Zot i dovineré pa ! Pars moin ossi, moin lété in pé étoné. Sak moin la antann sé sa : anfin in bone nouvèl i sort la péféktir ! Kossa-sa ? Nana bon nouvèl i sort la-ba don ? Mi trouv lé plito rar k’nana bon nouvèl pou nou, bann ti-kolon.
Sirtou bon nouvèl i sort la préféktir, pars dépi in koup de tan, moin na linpréssion na plito mové nouvèl i sort la-ba pou nou... lé rar, dizon konm korn lapin !
In pti bone nouvèl sansa in gran bone nouvèl ? Pars tazantan, i bate tanbour pou la po patate dann bann sèrvis l’Éta, épi ou i an apèrsoi lé konm fèrblan vide, la fé bonpé dézord pou arien ditou. In zanr nouvèl i kout dis santime, sansa sink, sansa moi. Pars moi d’novanm épi moi d’désanm, bann nouvèl déssi lo pri lésans, gazoil, le gaz té plito mol. Zot i ansouvien ? Moin lé sir zot i rapèl sa, mé sak zot la vi galman, sé k’zot pla la pa gonf in bon pé.
Donk in bon nouvèl ? kossa i pé ète d’apré zot ? Jeanne d’Arc la gagné ?
A-a-a, sa i gard pa méssié Préfé ! Noël i ariv ? Sa lé programé sa ! Vin désanm l’arivé ? A non, banna lé pa kamarad avèk sa ! Pou kissa i lé bone nouvèl la ? Pou bann ti-kolon ? Ditou mounoir. Pou bann fonksionèr alor ? A ouè ! La-ba i rode arienk zok azot ! Pou bann travayèr ? A ouè !
Na poin bone nouvèl pou zot : zot larzan i goumante pa, épi i promète azot shomaj pou lané 2009... i prétan dir i sava arash le kro o moin sis mil pèrsone. Pou bann érémi alor ? tank’a zot, konm dabitid, zot i deboute-guète ! Épi dann zot posh nana si tèlman le trou, in pti prime, i fé azot konm lo déssi fèy sonz, sansa déssi plime kanar !
Figuir azot, lo bon nouvèl, sé lésans va béssé ! A bon ! Kansa ? Moi d’févriyé ! Solman ? I gingn pa bèss toutsuit ? Alor, sa sé in vayan nouvèl pou vréman, mé sirtou pou bann pétrolié, pars zot pla i kontinié gonflé, é ziska févriyé, nana lo voul pou antassé.

Justin