La nouvèl ané l’ariv ankor in tour. In tour d’koi ozis ? In tour la tèr i sava fé otour d’solèy. Lé bien vré, li mète in n’ané pou li fé so bat-karé la. Ni vé, ni vé pa, mé lé konmsa é pa otroman : la tèr, satélit solèy, i mète inn ané pou li fé son révolisyon otour d’solèy.

Pou kosa mi di sa ? Mi di sa pars nou nana in n’ané pou ariv a fèr in n’ané valab. In n’ané pou ké 31 désanm k’i vien ni di pa, apré an avoir grate nout tète ziska lo san, an réfléksyon : In l’ané la fine pasé é nou lé pa pli avansé ké l’ané dèrnyèr.

Antansyon, mi antan déza in pé, apré di, ala ankor in fézèr d’bone rézolisyon. M’a dir azot franshman, mi pran pa bon rézolisyon pars mi koné sa sé in n’afèr zénéralman i tienbo pa . mé sa i vé pa dir, moin na poin bon l’intansyon, pou moin épi pou mo bann kamarad. La i sava anparl la politik ankor ? Lé oblizé pars la politik sé la vi mèm, é si ou i viv konm i fo out vi, ou lé blizé kalkil koman amenn lé shoz konm i fo pou ou, pou out parti, pou lo moun télkésé.

Donk in promyé prinsip i pass dann mon tète sé sète-la : i fo réfléshi sèryèzman dsi bann késtyon sèryé. Dézyèm prinsip : asir aou ké ou la fine kalkil lé shoz sèryèzman pou anons in l’opinyon avèk in bon fondasyon. Troizyèm prinsip : pou bien analizé i fo ou nana in bon griy pou l’analiz é kan ou lé sir ké out griy lé valab sé l’èr ki fo ou i tiliz ali bien konm k’i fo. Na in sans pou tienbo in marto pou fons in klou, a l’anvèr i marsh pa é la pa pars ou i gingn pa tiliz ali ké lo zoutiy lé pa bon : réfléksyon, konpréansyon !

Nana ankor in kozman ké mi èm bien : li di konmsa mète out l’ouvraz san foi dsi son l’métyé, polis ali san sès é arpolis ali. In bon prinsip an finn kont.. Bone ané 2016, mon bann kamarad.