I paré lo kar jone té gratuit mèrkrédi passé. Sak té i vé, i pouvé rant anndan kisoi pou alé travay, kisoi pou alé ran vizit in famiy loin, kisoi pou bate in karé, kisoi ankor pou dmoun la poin arien pou fé. Sa té in bon lidé pars banna téi vé angante bann moun i pran tou lé zour z’ot loto pou rant in pé dann kar épi oir koman i lé lanbians é sirtou pou an avoir anvi rant in pé pli pli souvan.
Soman zot i koné dmoun koman i lé ? Si in n’afèr lé gratuit, si i donn san péyé, lé possib in pé i abiz. Baba ! Mazine in pé si in zour i di réstoran lé gratuit, koman va fé avèk tousa gourman va prézanté ? Épi kalkil in pé tousa bann moun na poin ditou lamizman,na poin lokazion kansréti alé in pé la plaz, sansa dan lé o. Alor kossa l’arivé ? Zot la foulé épi kan l’ariv pou artourn z’ot kaz lo soir, lo kar té plin, léspri la shofé. In pé la rod bar lo kar pou grinp anndan. Bann shofèr la vi zéklèr !
Alor la di apèl la loi : la loi l’arivé mé la pa aranz lé shoz, z’afèr la vni pli sérié ankor. L’arète in pé marmay épi va prézabt azot dovan tribinal pétète yèr, pétète zordi, sansa somèn k’i vien. Pé s’fèr va kondane azot. Mi éspèr ké non ! Mé moin lé pa sir.
Ala in bon z’afèr k’i vien in mové z’afèr pars bann moun la fé sa té i mank azot in pé la matièr griz dann koko.

Justin