Nout tout i koné kozman-la é kosa li vé dir pou vréman. La plipar d’tan i di sa kan in bon moun – suivan sak son famiy i pans dé li !- i maryé avèk in moun na poin tout bann kalité k‘i fodré. Sé l’èr ké nout kozman i rovien souvan dé foi dann konvèrsasyon rant famiy. Solman la plipar d’tan néna in n’ot vérité. Lakèl ? Sé in késtyonn l’antant… Ni koné bien kan demoun i antan pa, la famiy lo garson i pans li nana tout bon kalité é lo famiy la fiy i pans galman son fiy sé in trézor. Final de kont lo famiy lo garson i pans li mérit myé é lo famiy lo fiy mèm z’afèr. Dann in ka konmsa mi pé dir azot tangaz la pa loin é dofé i tard pa pou pran dan la paye kann… Kan sa i ariv nana arienk in n’afèr i pé sov lo ménaz, sé kan lo garson épi la fiy, nana la fors pa suiv z’ot famiy é pa fé in kont avèk lo ladi-lafé. Tazantan sa i ariv mé sa lé rar ! Alé ! Mi lèss azot réfléshi la dsi é ni artrouv pli d’van sipétadyé.