La sékirité sosial i mank larzan : la pa arienk zordi, mé dopi in bon koup de tan. Prézidan la kour-dé-kont la trouv in tik-tak pou fé arant larzan dan la kès. Mète in kotizasion déssi bann stock-option : kossa i lé sa ? Sa in bann part lantropriz i donn déssèrtin pèrsonèl i diriz bann sosiété. La pa bann ti-kolon in gingn sa ! sa in bann gro vaza i gingn sa !
Alors mète in kotizasion déssi-sa, sé fé pèy bann rish : ala in bon nafèr. Sa i sava raport troi miliar épi i sa tir larzan-la dann posh bann nana, pa dann sak la poin. Kissa la di gouvèrnman la Frans sé in gouvèrnman pou bann rish. Konm di lo kont : ala la prèv !
Sof ké, kan bann dépité la diskité, par dsi diskité..lo bann règ dé kalkil, la miltiplié, la divizé, la fé in règ dé troi, la mète à la puisans tan épi ala lo troi miliar i fonn, i fonn, i fonn. Boudikont as’ki prétan va rès arienk dé san milion. Dizon, in gout dolo dan la mèr.
Alors lo taks déssi bann stock-option ? Sé pa lo bonb lavé di, solman in pétar mouyé !

Justin