Mi apréssyé, mé toute fasson mi aporte pa arien, mi invante pa arien,mon léspri linvanssyon , mon léspri la mazinassion lé konm an standbaye. Lé normal pars bande zémission-la lé toute sof inter-aktif. Donk lo téléspéktatèr lé pa la, pou rante dann ron, é dann méyèr dé ka li lé dsu lo bor. Pa bordé pars lo zimaz i kaptir ali épi i invite ali a rante dann ron san ké li pé réèlman rantré.

Kossa k’i mankré d’apré zot pou mwin profite in maksimome bande zémissyon konmsa ? i manke dé shoz sa lé sir.Dabor mi trouv i manke listoir :kanssasa lo pla la aparète dann la kuizine rényonèz ?I pé ratash sa avèk kèl lorizine noute pèpléman ? Si la évolyé dann tan ? Si in pé la désside « ro-vizite lo pla » sansa non ? Si té in pla pou rish,sansa in pla majiné par bande pov ?

Astèr mi rogarde ossi la koté politik :mi rogarde si apré kan lo pla lé fé épi konsomé,si li mète La Rényon an valèr sansa non ?Si néna sinploman in vizé touristik ? Antouléka, m’a dir azot, fransh vérité, konm la kuizine i fé parti la kultur d’in péi, si shak soiré manjaye sé lokazyon rouv in shapite la kitir nout péi La Rényon.Konm noute kuizine sé galman nout kultur, lé myé ké ni arsorte d’in lémissyon konmsa léspri ankor pli kiltivé ,ankor pli rényoné apré k’avan.

Pou kossa mi di sa ?

Pars si i kontinyé konmsa lé riskab nou na pliss la kantité ké la kalité.. antande amwin bien, mi vé pa dir i fé mové manzé, mi pans mèm i fé bon manzé, mé mi anparl lo kontenu kulturèl é si possib mi yèmré sé in kontenu d’kalité. Lé possib sa,Lé pa tro domandé mi éspèr !

A bon ékoutèr :salu !