Oté

« In boubou ségré lé posib i géri pa zamé »

In kozman pou la rout

Justin / 12 mé 2018

JPEG - 43.6 ko

Tout marmaye la viv dann bitasyon i koné kozman-la. Forsé, ou i blès par isi, ou i korsh par laba, zépine i pik aou, vèr boutèye i déshir aou. Parl pi kalité koud’kongn i dévir out doi pyé an po zak. Kan téi ariv anou in n’afèr konmsa, nout famiy téi di anou tranp out pyé dann lo salé bien sho, sansa dann in bin kolkol - i apèl ankor gérivite. Ou na d’shans oir out boubou géri. Astèr si ou i songn pa li, ou lé riskab oir ali infékté… Dann la vi koman i pé tradui in n’afèr konmsa, ou i pé di, si ou néna in gro problèm kashyété, arfoulé par anndan, lé posib i pass arpa zamé. Mé si ou i partaz, si ou i rokonète, pés fèr ti-lanp, ti-lanp lo mal apré manj aou i diminyé ziska k’in zour ou na moiyin siporté é mèm la doulèr diminyé firamézir. Mi lèss azot rofléshi la dsi é ni artrouv pli d’van. Sipétadyé.