Pèz lo vant avèk delo plito k’amontr son mizèr !
Poitan, ni antann parlé par issi, par la-ba, bann z’asosyasion i distribyé koli alimantèr. Kan bann mizilman Sin-Dni la distribyé mil koli, in pé l’atann ziska pandan sétèr d’tan. Di amoin in n’afèr ! Si ou la pa fain, ou i sava atann débout konm poto fanal tousa d’tan pou gingn in koli manzé ? Moin, pèrsonèl, mi pans pa ! Somanké, in pé i di konmsa, avèk tout so ram l’asosyasion, na pi pèrsone la fain. É la ont kréol, zot i koné kosa sa i vé dir ? Moin lé sir é sèrtin k’in pé i pèz zot vant avèk delo plito alé montr zot mizèr.

Sa in ka vré sète-la
Sak mi rakont azot, mi pans nana bann ka konmsa in pé partou. In jènn ménaj i toush son larzan la CAF, mé kan la fine pèy loiyé, lo, léstrésité, épi dé troi babyol, na pi aryin. Alor lo boug i sava an tourné tou lé soir. Li sava dovan la port réstoran, kan sèrvis la fini, pou gingn in pé manzé. Sansa lé pa possib ranpli moindroman in pé lo vant son pti famiy. Byin sir, la famiy lé solidèr, mé èl mèm la poin lo nésésèr tou lé zour.

Alors, kan dan la nuite, son pti moto i démar, demoun i koné ousa li sava. Li sava rode in boushé manzé pou ranpli lo bouzaron son famiy : son madam, ali-mèm, épi son pti baba.

Justin