Oté

« In boushé manzé, sa i anprèt pa ! »

In kozman pou la rout

Justin / 14 séptanm 2016

Par nout pasé, nou la gingn an éritaz désèrtin tradisyon i asosyé pou fé la kiltir nout pèp. Moin la fine ékri in kantité… in pé an dézord lé vré, mé sa i rotir pa z’ot valèr. Moin la touzour antann dir si in moun i vizit aou, l’èr ou l’apré manzé, i fo partaz avèk li. Kan nana manzé pou troi, nana galman pou kat. Mi ansouvien, in zour, nout famiy la fé son rantré dann in nouvo kaz é mon bèl mèr l’avé di : in moun étranj v’arivé, done ali in z’asyète manzé pars sé Bondyé k’i anvoy ali. Figir azot, zour-la, in ramasèr boutèy la pasé, é la famiy la fé konm k’i dové. Pou kosa ? Pars sé in bon prinsip, é bann bon prinsip sa lé bon pou ranfors nout pèp épi son bon tradisyon.