Oté

In bout la lète Rita Bancoult Justin la mète an kréol rényoné

Justin / 3 séptanm 2018

JPEG - 43.6 ko

Médam, Mésyé, la sosyété, moin la rotrouv in lète Rita Bancoult, la momon Olivier Bancoult, prézidan Group Réfijyé Chagos la ékri moi d’désanm 2010 l’anbasadèr GB dann l’il Moris pou réklam son droi rotourn dann son péi natal pou antèr son kor kan la mortalité v’arivé. Zot va oir kan zot va lir lète-la, konm moin, zot kèr va déshiré.

« (…)Vi doi konète, pou moin, bann britanik la vol lo droi pou viv bann chagosien. Lo zour, moi la aprann mi gingnré pi rotourn dann mon n’il, dizon lété konmsi, l’avé pik amoin in kouto dann kèr é moin té pé santi lo san koul dann lo blésir.
Mi gingn ankor santi, sa dann mon l’intéryèr. La vann anou konm i vann zanimo. Ou i koné kèl soufrans sa i fé kan i rash aou par raport out péi natal é kan i zète aou n’inport ousa ? Ou i san konmsi ou lé infèryèr par raport in zanimo. I priv aou out dignité. Pli pir ankor ou néna pi out l’idantité. Nou bann shagosien la vol anou nout dignité. Sé sa mi rosan zordi.
Mésyé Leake, mon nonbril lé antéré laba, dann Peros Banhos. Moin la pa arète in néstan pans mon tèr natal, pans la tonm mon bann paran é tout bann disparu, mi port dann kèr, moin té forsé lèss azot laba déryèr moi.
Lo zour moi sar apré ropoz dsi mon li d’mor, zour-la lo rèv mi port dann mon kèr, dopi lo zour moi la kite mon patri-mon rèv pou rotourn laba.
Moin na pi in sèl l’anvi zordi sé d’alé mor dann Peros Banhos épi k’i antèr amoin dann simtyèr moin la fine antèr dé parmi mon bann zanfan épi mon dé paran.
Moi la pèr mor avan san gingn réaliz mon soué.
Mi ronons ar pa mon droi.
Mi éspèr mon lète va toush out kèr. Mi éspèr galman ou i travèrs ar pa zamé lo bann tourman, amoin épi mon pèp nou la travèrsé pandan tout so bann z’ané.
Pars sa sé lo pli gran malèr inn pèrsone épi inn nasyon i pé travèrsé.

Marie Rita Elysée Bancoult –
Tèks-la lété ékri dann la lang bann zanglé, Sé Alain Dreneau-sokrétèr Comité solidarité Chagos La Rényon, la mète ali dann la lang bann fransé é zordi sé Justin la mète ali an kréol rényoné. Rita lé mor ni koné mé lo rèv bann chagossien pou moin li lé pli vivan k’zamé.