Mézami, kozman mwin la mark zordi mwin la antande ali dann in ropa d’famiye dann in pti ralé poussé, règloman d’konte.

Sa i rapèl amwin in n’ote kozman mwin la antande daoir o moinss trantan, kan in momon té apré antroprande son garsson pou sak èl téi oi konm in mézalyans danzérab, lo ga so kou issi la réponde son momon-non, la pa réponde pars dann tan-la in zanfan téi réponde pa son momon – anfin li la di : « in krapo va touzour rotrouv son krapode ! ». Mi pé dire azot lo momon lété bandé an trant-sis av èk son garson. Zot i pé konprande kalité kozman-la, i fé pa plézir pèrssone. In pé i fash èk zot famiye pou moinss ké sa. Mwin mi plède pou la toléranss pars èl tousèl i pé pèrmète pa kass toute.

Alé ! Mi kite azot rofléshi la dsi é ni artrouv pli d’van. Sipétadyé.