Pou sak an parmi nou néna déza in pé lansyèneté dann noute égzistanss, sète istoir d’mézir sou in nom sansa sou in n’ote nom sé in n’afèr ni koné dopi lontan : néna touzour bann mézir anonssé épi bann mézir réalizé : in kou la pran 73 mézir é néna arienk dis la konète in komanss mann réalizassion.

Pou kossa ? Pars la réalizassion i suiv pa touzour la priz déssizion épi lo délégué k’i okipe sa i rokoné li mèm li lé bien toussèl é san pouvoir pou li fèr in n’afèr éfikass. Mé i fo dir bann zinstitission dann loutremèr i zoué pa sèryèzman in zé éfikass pou ariv in bon rézilta.

Lé prévi in Ciom (comité interministèriel pour l’outre-mer) é konm lo PCR i di sé anou d’rande so mashin-la éfikas é lé pa si fassil ke sa avèk in bann zélu i tir shakinn dan son sanss san mète noute pozission rényonèz o santr d’inn pozission rézonab épi éfikass pou noute dévlopman — parèye pou lé zot péi loutremèr mé shakinn suivan son poinn vizé.

Mé sirtou i fo pa lèss gouvèrnman-la manipil anou konmsa. Néna tro problèm shé nou épi dann bann péi loutremèr pou lèss banna fé lamizèr piblik. Soi i pass, soi i kass ! soi i pass avèk in loi program pou in vré dévlopman noute bann péi avèk in dékolonizassion réèl, soi ni pé pa kossione in n’afèr konmsa.

A bon antandèr salu !

Justin