Dann tan-la ni pé dir nou lété san pèr malgré toute sak noré pi ariv anou sitèlman lo séktarism lété la loi dann la Franss la sinkyème Répiblik, épi dann la sossyété rényonèz galman. Sirman zot i rapèl lordonanss oktob soissante — i apèl sa galman lordonanss Debré — é ni koné bien si sa lété fé dann la guèr lalzéri, sé sirtou bann fonksionèr rényoné épi lézot Dom la sibi in n’afèr konmsa.

Boris Gamaleya sé inn viktime so loi-la avèk d’ote fonksyonèr, la plipar étan kominiss étan mèm otonomiss. Mi sava pa anparl sa mé sak i vé rafrèshir in pé zot mémoir Témoignages lé la é lé possib alé lir ali pou konète in pé noute kistoir épi pou rann anou konte lo tan la diktatir la pèz dsi nou rényoné — sak i kroi pa, sansa a domi, mi invite azot lir noute zoinal. Mi assir azot vitman-vitman zot va konprann la shape lo plon nou la konète dann bann zané-la.

Astèr ni pé dir nou lé anplin dann la somenn kréol é sirésèrtin in pé partou bann rényoné va fé la sélébrassion k’i fo pou noute lang, noute kiltir, noute litératir. Sirésèrtin ni pé dir nou la avanss in bonpé mé anveu pa d’mwin si mi di néna ankor in bon boute shomin pou fèr kissoi dan la lang, kissoi dan la kiltir, kissoi ankor dann la libérassion noute bann léspri-san parl noute lékomi d’prodikssion i rèss pou mète an plass — anfinnkonte in vr édévlopman noute péi pou fé.

Si mi vé mi pé rézime l’afèr dann in sinp mo, mi pé i apèl sa la dékolonizassion… in déolonizassion vréman nésséssèr. A bon antandèr salu !

Justin