Kan la koloni d’Maurice la rokonète son kalité d’om lib dann l’ané 1829 par-la — li la pran lo nom Madeleine. Donk i koné ali konm Joseph Furcy Madeleine mé pou La Rényon li lété touzour konsidéré konm in zésklav parti maron. Son kalité d’om lib dopi son néssans té rokoni apré son prossé dovan la Kour roiyal Zistiss é li la pran définitivman lo nom mwin la marke an-o la.

Joseph Furcy Madeleine la komanss fé d’zafèr pou son kont-avan lété pou lo kont la sèr Joseph Lory-mé inn foi ké laba dann Maurice son kalité d’om lib té rokon, li la pran lo métyé d’konfizèr é an tan k’konfizèr li la bien gagn sa vi. I fo dir dann péi Bourbon avèk son momon, épi laba dann Maurice li la bien aprann son métyé.

Aprésa li la maryé, li la gingn zanfan épi konm mwin la fine dir li lé mor l’ané 1856, l’ané son soissante dizyèm l’aniverssèr. Mé dann tan fèr dé zafèr sa téi védir ashète zésklav ou ède aou é Furcy li ossi li l’ashète dë zésklav é banna té lib l’ané 1835 avèk l’abolission par langlétèr.

Avan ni tak baro ni pé dir wala in bon konba in prétandi zésklav l’amenn kont lo pouvoir kolonyal, é mi panss son konba i dové ète danzéré kan mi oi lo trètman bann zésklavaziss la fé sibir ali. Dizon banna l’avé pèr légzanp Furcy pars li lété in linjénu — kélk’in té lib é li téi koné pa. Alor kél légzanp pou toute bann zésklav pa déklaré ?

A bon antandèr salu !

Justin