Matant zélida la ékrir Justin :
Mon shèr nové, mon spès salté, rouj-de-fon dovan l’étèrnité, néna lontan mi rode titiye aou in pé dsi lo késtyonn bann srilanké. Mi paryé ou lé konm in pé sak i domann demoun ète bonkèr par raport banna pars zot i anplègn zot lé maléré, zot lé dann danzé. In pé i di mèm si zot i artourn laba shé zot gouvèrnman lé riskab tyé azot, épi zot famiy. Poitan, isi La Rényon lé pa posib anpar in sityasion konmsa. Pé sfèr sa i shok in pé désèrtin kan mi di i fo zot i artourn shé zot. Mé lé konmsa épa otroman. Tok ! Pran sa pou ou !

Justin la fé pou répons :
Mon vyé matant i koz la boush rouvèr m’a komans par dir aou kékshoz :
Ou i koné matant lé rar i pé ésplik in n’afèr konpliké avèk in rézoneman sinp. Sansa pran in désizyon sinp po in bann demoun dann in sityasion konpliké. Sa i vé dir : si mi di « ranvoye azot dann z’ot péi », mi di in n’afèr sinp pou in kantité d’moun dann in sityasion konpliké. Si mi di : « Lèss zot tout isi ! » lé parèye : in désizyon sinp pou in sityasion konpiké.
Dézyèm zafèr : ni pé rézone pou nou isi, mé pa pou sak i ariv laba dann Srilanka pou l’instan. Ala in péi la konète vin sizan la guèr. In péi zordi néna dé promyé minis pars inn la pa aksèp ète viré, épi l’ot la poin lo vote favorab lo bann dépité. Arzout èk sa kan in guèr sivil la fé san mil mor dann lo péi-an parmi in gran kantité bann tamoul.
Astèr néna in proféktir, d’apré sak i paré, i pans li koné bien la sityasion dann péi-la, é noré d’apré sak i paré bon rolasyon avèk la polis lopéi. Moin pèrsonèl, mi dout pars néna si tèlman tangazlaba… Tout fason sé l’éta ki doi trouv in solisyon pou problèm-la é mi souète in solisyon i koréspon lo droi épi si posib in solisyon i répèk l’imanité.