Mi sort antann, dann radio, nout lékonomi rényonèz lé plizanpli vayan. Lé pa étonan l’Iédom i done in nouvèl konmsa dann moi d’avril pars i fo pa ni obliy dann moi d’avril néna in zour sé lo promyé. An pliské sa, i paré dopi dizan nout l ékonomi i arète pa pous an avan é l’ané 2018 lé riskab ète in l’ané d’anfèr pou nout to d’ kroisans.

Ou i mézir avèk lo mète ou l’ashté é si lo l’inité d’mézir i konvien pa, étone pa ou si lo rézilta la pa sak ou i oi d’apré ou, si an touléka ou i trouv pa sak ou i voudré trouvé. Biensir mi parl lo pib é ni koné nout tout si lo pib i marsh a krazé la pa pou sa l’ékonomi lé an bone santé. Poitan, nou noré bézoin d’in l’ékonomi an bone santé.

Nou noré bézoin sirtou in lékonomi d’prodiksyon k’i marsh in pé myé. Kosa k’i ansèrv anou si bann komèrs i vann produi déor i fé in léksélan shif d’afèr ? Kosa k’i raport anou si ni ashète plizanplis loto alé oir isi i fabrik pa in sèl vyé kok loto. Kosa k’i sèrv anou la vant shanpagn, la vant téléfone, sansa ankor sète bann produi d’liks, sak lé fé ayèr é i fé ashté anou travaye demoun déor avèk in dézékilib plizanpli gran rant l’inportasyon épi l’ésportasyon.

Poitan n’inport ki i pé dir in vré politik dévlopman lé pli nésésèr zordi ké zamé. Pou kosa ? Pars tout alantour d’nou néna in sèryé pousé démografik, é lo soidizan bon figir nout l’ékonomi i atir plizanplis demoun déor é si tousa d’moun i vien, dabor nou na poin lo moiyin pou anpèsh azot rantré, é nou na poin lo moiyin okip z’ot trop plin.

Kèl solisyon ? Lo mèm ke dann l’ané 1959, lo mèm k’aprésa, lo mèm ké zordi : dékoloniz nout péi é dévlop ali. Mé mi pans nou va arparl de sa pars fons dann mir i vé pa dir rouv in shomin.