I rossanm matante Zélida la déside ékri amoin in lète shak lindi. Ala kossa lo vié jiman i i shant amoin zordi :
Mon shèr nové, moin la fine dir a vou mi ème bien lo prézidan Sarkozy. Mi pans pti bonom-la i travay po nou. La prèv, li la fé in plan pou vanj kont la maladi déssèrtin vié moun. Alors li la mète in pti franshiz déssi médikaman, in pti katsou mèm déssi shak boit : i fo vi tir sa d’vot posh..Mé konm lo pti bonom la di : larzan i trap pa sou la pat shoval ! Sak lé kont la franshiz na ka trouv larzan in n’ot koté zot.. Épi, i fo moin lé pou la franshiz, akoz nou bann la droit, nou lé fran nou !... Anbras bien Justine avèk son bann ti-zanblon. Kèl maléré sor an avoir in mari konm vou !
(FPMB : fèrmé par mil baizé, lo baizé d’Jida an parmi)

Mon shèr matante, mi kroi, zordi, ou la grandi ankor lo roiyom la kouyonis. Mi koné, moin, oussa i trouv larzan : dan la posh bann moun nana lo pourkoi. A komansé par sak i pèy vakans pou lo prézidan, méssié Bolloré.Zot nana si tèlman larzan, i diré konm séga lontan, shakinn nana in mal bourik i kaka l’or. Zot l’or sé la transpirassion èk la soufrans bann ti-kolon.

Justin