Na poin tro lontan, moin la antann lo mèr Sin-Pyèr apré di i fo fé konfyans la zistis son péi. Pou mon par, mi méfyé bann gran fraz konmsa, pars in ziz, sé in moun, é li pé an avoir son kalité konm son défo, li pé an avoir bon z’idé konm mové z’idé. Arzout avèk sa l’èr-di-tan... lo bon l’èr konm lo mové l’èr. Pétète pou sa i pé fèr apèl, domann kasasyon, alé dovan la kour éropéène bann droi, étsétéra-étsétéra, la ké lo ra.
Koméla, moin na konm l’inprésyon bann mizilman na poin tro la kote. Na in loi fransèz fé, sanm pou moin, éksopré pou zot... touléka, pou lo pti trépé rantro zot, i port lo voil intégral. Arzout èk sa bann média k’i konfonn éksopré mizilman avèk z’Arab, avèk intégris. Nou v’arète la, mé sa i ésplik pou kosa in-dé tète fèb i pans zot i pé fé n’inport de koué. La-ba dann la Frans, nana in moun la bril le Coran, épi pou tinn lo fé, la piss déssi é li la mète sa déssi l’intèrnèt. Lo Coran, konm zot i koné, sé lo liv sakré bann mizilman ; Mi pans, pèrsone noré émé k’i fé sa avèk la Bible, sansa avèk bann liv sakré bann moun i pratik la rolijyon tamoul. Shakinn nana son rolijyon é li doi ète réspékté dann son shoi, é réspèk son liv sakré, sa i fé parti lo réspé son rolijyon. Sa lé dann dovann-port nout Konstitisyon si mi tronp pa (i di ossi lo préanbil).
La zistis la fé in prosé, mé lo ziz la rakite lo malfondé, pars solon lo zizman, fé in n’afèr konmsa i fé parti lo droi d’éksprésyon. Mi koné pa kosa zot i anpans, mé mi rosoi in n’afèr konmsa konm in éskandal, pars si sé sa, domin nora in léspri tort lé riskab fé sa avèk la Bible, sansa lo Véda, sansa d’ote liv sin ankor... akoz pa rant dann in l’androi i pratik la rolijyon épi kass tout, épi fé tout grosyèzté. Antansyon pa rouvèr la boite Pandore !*

* Na in lézann i di, sa in spès gargoulette ousa nana tout malédiksion l’imanité. Si ou i rouv sa, tout kalité tablatir i sort la-dan pou alé kontamine la tèr.

Justin