Mi pans, konm moin zot lé aboné avèk in konpagni d’lo : ni doi pèye nout faktir épi la konpagni i doi donn anou d’lo, sirtou konm i di dolo potab. Dolo pa potab ? Kite. Shakinn, nou konm la konpagni, néna son zobligasyon résiprok donk inn par raport l’ot.

Mé a bien kalkilé néna, konm i di, in partaz lo rol la pa si égal ké sa rant bann konpagni é nou, lo bann kliyan. Ni pé anparl in bonpé lo poin, mé mi pans sré tro long pou mon pti modékri. Ni pé oir aerienk in poin : lo potab.

Si zot néna famiy Sintandré é si zot i rann banna vizite in pé souvan, mèm rant rant zot va oir la kaz banna – pa dann tout kartyé, mé kant mèm dann désèrtin-bann gro bonbone dolo avèk sak banna i apèl lo fontène. Zot va konprann tout suit la kaz banna i boir pa d’lo robiné. Par raport kosa ? Par raport dolo robiné lé pa potab. Poitan dann kontra lé marké lo lo i doizète potab. Sa la pa in kou d’kanif dann kontra maryaz sa ?

Pli pir, kan néna mové tan, lo robiné lé konm k’i diré koloré-koulèr pisa si zot i vé ! - é demoun i gingn pa l’anvi bross z’ot dan avèk sa. Mèm lav z’ot linz, épi kui manzé. Sa i fé pans amoin in zour mésyé Virapoullé l’avé di Sintandré i gingn done dolo lo Por. Rozman pou bann portoi li la pa fé ! Rozman bann portoi la débrouye azot par zot mèm pars sansa zot, noré té pri dan la kol konm demoun Sintandré lé pri zordi.

Sorman, mèm l’androi lo lé sal, mèm l’androi néna koupir par dsi koupir, sa i anpèsh pa bann konpagni grosi z’ot pla an vandan a nou in produi k’lé a nou. Si sa i apèl pa anbète bann rényoné, mi oi pa koman sa i apèl. An touléka, ala i drol kontra rant bann konpagni dolo épi nou lo bann kliyan.