Oté

In élu sé in militan an promyé ! É li doi rèss konmsa !

Justin / 21 mé 2019

JPEG - 43.6 ko

Ma dir azot, moin pèrsonèl, mi yèm pa bann zélu profésyonèl. Mi yèm pa sak i okip bann post zélu dopi lo komansman zot vi politik ziska la finisyon. Mi yèm pa non pli bann zélu birokrate, sak i pans zot lé a san pour san dann zot post de zélu é finalman na poinn kont pou rann avèk lo pèp. Bann gou épi bann koulèr na poin pou diskité ? Mé anfinn kont néna pou diskité zistoman, pars néna kant mèm lo bon gou avèk lo mové gou.

In élu i pans arienk pou gonf sa posh ? Ala inn prèv do mové gou. In élu i pass son tan karovindis pour san son tan dann son fonksyon éi obliy sak la mète ali landroi li lé ? Ala pou moin in prèv mové gou. In élu lé bien kontan son bann kolèg i done ali tèl tit épi tèl tit bon dépité, bon sénatèr, bon sosi épi bon séia ? Ala, sanm pou moin in prèv dé mové gou. Zot va dir amoin sa sé in léspèss i mank pa nou isi La Rényon é oplis i sava, oplis néna.

Mé in élu i konsidèr ali an promyé konm in militan, é I consider son promyé dovoir sé d’ète lo pli pré posib par rapor son bann kamarad épi son pèp. Ala pou moin in prèv bon gou. Anpliské sa, sa i anpèsh ali fé gonf son shoviyé sirtou i anpèsh ali kroir li lé konm la gronouy i pran aèl konm pli kosto k’in bèf.

Si mi di azot an parlann Paul Vergès, sansa Elie, kan zot lété député, é kan zot téi rovien La Rényon, zot té i artrouv zot bann kamarad ébin mi doi dir, ala bann zélu mi aprésyé. Néna d’ot ankor mi rokoné zot la fé konmsa. In élu, sé in militan é li doi rèss konmsa mèm, avan zot i dégote zot post de zélu.