Mi pans, si zot i suiv in pé lo l’aktyalité, zot la aprann ké bann résponsab nout parti la fé in domann piblik mésyé l’anbasadèr La Frans avèk la COI, Mésyé Hallade, pou domann ali pou rann piblik bann trété éropéin. Kèl kalité trété ? Sa bann APE donk bann z’akor pou in parténarya ékonomik.

In bon n’afèr sa ? A ouète ! In bon n’afèr pou ki ? Pou la Rényon ? Dabor pou ète in bon n’afèr i fo konète koué nana dodan é kisa i pé konète bien koué nana dodan ? Bann moun dan la Coi. Dakor ! Bann roprézantan l’erop ? Dakor. La Frans ? Pétète mé konm li lé sinploman in manm obsèrvatèr dann la Coi lé in pé étonan pou moin ké li koné a-fon lo trikmardaz.

Trikmardaz ? Sa sé in magouye. In magouye pou la favèr sak nana in l’intéré dodan. In magouye kont ki ? Kont sak lé déstiné pou ète lo dindon dann la fars é kisa i doi z’ète so dindon-la ? Pa La Frans pars èl na d’ot z’intéré an vu, é pars l’intéré La Rényon èl lé pa la èk sa, èl i s’anfou dsa. Lo dindon sé nou, rényoné é pli-pir ankor ni koné pa avèk kèl sos ni sava ète manzé .