Matante Zélida la ékrir Justin :
Mon shèr nové, mon spès salté. 20 désanm i ariv ankor la. Mi sar antann azot ankor in kou fé dézord ; mète la mizik for, bate maloya. Solman, i diré, zot bann rouj de fon, zot la konm oubli in n’afèr inportan, konm k’i diré i mank in fèy dann z’ot tèt. Kossa i lé ? Sé k’vin désanm-la, sé la fète bann kaf - i di pa "la fète kaf" ? Sa la pa la fète bann blan sa, ni bann malbar, ni bann shinoi, ni bann zarab. Alor, fé konm zot i vé, mé in n’afèr konmsa i pé pa boujé pars sé la vérité vré. An parmi sak l’apré fété, i oi bann blan, bann jone épi bann gri, bann roz, mé la fète kaf, sé pa zot fète... ké zot i vé, ké zot i vé pa, lé konmsa é pa otreman. Tok ! Pran sa pou toi !

Justin la fé aèl pou répons :
Mon vié matant, out kozman i rod diviz demoun plito k’inir azot. La fèt vin désanm, mi pans, sé pou inir bann moun é sirtou pa pou diviz azot ! Matant, pou moin, sé in dovoir mazine nout bann zansète épi fé la fèt an souvnans de zot. An parmi nout bann zansète, nana té i sort l’Europ, sak té i sort l’Afrik, lavé ossi malgash, z’indien. An parmi, lavé sak la gingn koud’shabouk, la angrès la tèr La Rénion avèk zot san, zot pléré, épi zot transpirasion. Vi konpran ni doi azot la rokonésans. Sé pou zot sirtou ni doi fé la fète zour-la !
Bien sir lavé sak té i gingn koud’shabouk, épi sak té i donn lo kou d’shabouk, sak té i travay, épi sak té i profit, sak divé kann i rant dan la shèr é dan la po, épi sak té i anpar solèy sou la varang... Sa ni doi pa gnoré, mèm si nout kèr i singn, si li lé an langouti... pars souvan dé foi, nout bann zansète lété shak koté lésklavaz.
Matant, nout péi lé konmsa. Ni pé pa fé otreman k’siport nout sor. Mé ni pé ossi tir la fors la-dan pou alé pli loin, pou alé pli for, alé pli o, nout tout ansanm. Pou sa mèm i fo ni fé la fète vin désanm, in fèt pou La Rénion, pou bann Rénioné !

Justin