Zot i koné kosa i lé la roulète russe ? Si zot i vé sé in zé i briye pa par son lintélizans. Dizon ou i pran in pistolé avèk in bariyé i pé rant sis bal dédan é ou i mète inn solman. Aprésa ou fé tourn lo bariyé épi ou i brak sa dsi out tanp épi ou i pèz dési la ké d’détant. Si i tonm pa an fas la bal i fé tak in poin sé tou. Apré ou i arfé tourn lo bariyé é parèye i pé s’fèr i fé tak donk okin bonsékans, i pé s’fèr i fé pan é adyé la vi.

Lotrozour moin té apré ékout in mésaz dann télé dsi lo corona-virus. Té i done bann signalman lo maladi épi téi di « rèss out kaz, somanké lo maladi va pass tousèl. Si i pass pa tousèl é si ou i gingn loprésyon fé lo kinz. ». Donk si ou néna lo bann signal, ou i rèss out kaz sinploman san pran médikaman. Out pasyans i pé dir plizyèr zour é aprésa ou i gingn l’oprésyon é l’èr-la ou i kriy o sékour, si ou i gingn pa raien mèrsi ma tré sint vyèrz.

Bann gran doktèr-la noré pi dir : apèl out médsin épi li va donn aou in trètman an atandan épi fé in tèst pou oir si ou néna la maladi toulbon. Marsèye laba konmsa i fé, é dann d’ot landroi konm madégaskar i done aou in tizane pou sèye anpèsh la maladi arivé-si i ariv pa lé bon pou sa mèm, si i ariv diréksyon lopital… Astèr kalkil in kou lo traka ou lé d’dan si ou i aplik in léstarézi a la fransèz. Kap kap i mont dsi ou ! Mové rèv an poundyak ! La pèr ! lo blouz ! Ou lé pli mor ké vif ! Aprésa soi ou lé trankil, soi diréksyon l’antishanm roiyome vant an l’èr.

Mi trouv pa bann doktèr la trouv léstratézi a la fransèz lé si malin ké sa. Pou kosa ? Pars ou néna lo shoi rant dé solisyon : inn i ariv pa ou arien, dé ou i gingn lo maladi pou d’bon, in form grav, avèk lo konsékans ké ni koné. Soi i fé tak é la maladi i pass, soi in somenn apré i fé pan é mazine azot la suite. Anfin, konm i di, in fo z’èr d’ la roulète russe.
Alé ! Ni artrouv pli d’van, suivan k’i fé tak, sansa k’i fé pan.