Mé zami, mon bann dalon, lé kant mèm maléré kan ou néna afèr in l’éta i pran pa out problèm sèryèzman konm k’i fo. Pétète pars li koné pa sak i fo pou ou, pétète pars son léspri kolonyalis i pou s ali pou fèr anou d’tor, pou fér d’tor lo pèp kolonizé-mèm néokolonizé. Pou li alé dann out sans i fo li sava dann son sans é ou i vé ou i vé pa li profèr alé dan son sans épi dann sans lésploitasyon néokolonyal ké dann out sans aou. Sak lé pa dakor, i fo ni dislkite !

Gouvèrnman la lans in réform lo droi l’inskripsyon l’inivèrsité pou bann zétidyan étranj é sa sé in n’afèr mi trouv lé dégélass pou vréman. Li rolèv lo pri l’inskripsyon pou bann étidyan étranzé solman. Koméla, in l’étidyan étranzé i pèye 170 èro (d’apré sak mi koné) pou fé inskri ali dann in l’inivèrsité konm sak néna La Rényon. Si lo plan gouvèrnman i marsh bann zétidyan étranj va pèye 2770 èro pou in l’ané lisans épi 3400 èro pou in l’ané doktora. Zot i konpran malèr i sava ariv bann zétidyan bann péi l’oséan indien si gouvèrnman é pa anpéshé pou fé son mové kou.

Pou kosa gouvèrnman i fé sa. Pars i paré bann zétidyan étranj va pèye lo tyèr sak in l’ané inivèrsitèr i kout pou vréman. Epi pou fé fas gouvèrnman va donn plis la bours é lo bidzé l’inivèrsité sar moins dann malizé - mon n’èye oui ! Alor, dsi sa ousi gouvèrnman i raz la pint san kalkil nou lé iisi dann l’oséan indien épi néna bonpé zétidyan kisoi komor, kisoi malgash, kisoi ankor morisien.I paré shak ané néna par la 800 zétidyan étranjé i vien nout l’inivèrsité pars z’ot kèr i pous azot shé nou. Konbien va résté ? Koman gouvèrnman lé pirate don ?

Anplis sa sé in danzé pou nout rolasyon avèk bann péi l’oséan indien konm nou si nout bi sé d’trap l’indyanoséani. Désizyon gouvèrnman i tonm mal po nou pars sa i andikap nout l’avnir. Pétète li, li s’anfou, mé nou, nou k’i vé in éstratézi l’otosantraz (Sarkozy té i apèl sa in dévlopman andojène) par raport l’androi ni rèss. Dizon in foi anplis li vé koup nout zèl. Si ni lèss ali lo mal i soré fé é nout l’avnir nout rolasyon dann nout landroi andikapé. In foi anplis, in foi an tro, gouvèrnman i vé rongn nout zèl.