Pou sak i èm bann poèm dann nout kréol rényoné, mi propoz azot in pti fonnkèr Axel Gauvin la ékri nana in bon koup de tan. Pou moin, sa lé osi valab ké désèrtin tèks Fourcade, ou sinonsa sète Alain Peters, Jean Albany, épi d’ot ankor mi sava pa di lo nom isi, pars la pa pou riyin i di La Rényon sé l’il bann poèt é lo nom bann poèt i mank pa. Lir ali, zot va oir si sa la poin son gouté.

« Mon koeur i galope dann santié kabri i grinpe dessu Taïbit.
Lu assiz en roi dann la Kavérne Decotte.
Ala mon lodeur brande, kank brouyar i lève,
Kank la kloche Boi-d’ranpar i sonne pa po la mor
Kank vieu gramoune Picard devan Volkan i rève ».

Pou kosa, mi propoz azot so pti fonnkèr-la ? Pars lo brui i kour lo Park nasyonal, i sava pran sa pou fé valoir l’am kréol. Si sa i ariv, moin sar kontan, pars so pti poèm i mète vréman an valèr l’am kréol, é i fé bien valoir la poézi lé o nout péi. In poèm, po èm nout péi, son kiltir, son listoir... koué d’myé k’sa ?
Si mi propoz azot sa, sé ké désèrtin maloki, la ékri in lète prézidan l’UNESCO pou dir ali bord fonnkèr-la, shoizi in n’ot. Si, par maléré sor, in n’afèr konmsa i ariv, pou moin sré konm in zirman boush sal kont nout litératir kréol, sré konm si i krash dsi nout kiltir, konm si i krash ankor in kou dsi lo jéni nout pèp kréol rényoné. Sré in réprésyon konm dann tan mové tan.

 Justin