Solèye la fine lav son pyé. Lo zour i tard pa pou tak baro. Nout tète spandan i arète pa travaye. Sé l’èr ni majine kosa nou la fé zordi, kosa ni sava fé asoir, kosa i trakas anou é kosa i trakas pa nou. Souvan dé foi, kan i ariv sètèr isi, nout kor i ramoli in pé konm si li téi vé amorti in pé la fatig li la gingn dann la zourné.

Mi pans, pou désèrtin, l’èrla lé bon pou fé in sort l’égzaminn konsyans. Lé bon pou ropass in pé sak nou la fé, épi sak nou la pa fé, in manyèr pou oir si nou la fé sak ni dové fèr… L’èrla néna in bon dalon i apèl amoin pou fé son romark dsi lo « oté » la pass dann zoinal zordi... Mi yèm bien kan li apèl amoin pou dir amoin sak li pans é mi èmré in pé tout nout bann kamarad épi dalone-dalon i apèl amoin pou dir amoin zot osi kosa zot i anpans an bien konm an mal..
Késtyon li la poz amoin asoir, pou moin sé in késtyonn d’fon .

Li la dmann amoin si forum la spass Tana avèk konm klé d’sol la solidarité avèk bann shagosien, si sa va ansèrv La Rényon. Zot i oi la pa in késtyon anlèr, mé in késtyon difisil pou réponn. Mé konm l’om la gingn in mémoir avèk la natir, moin la pans di ali in n’afèr. Ala lo zafèr : kan nout parti té solidèr bann patriyot vietnamien, sansa bann patiyot alzérien - épi d’ot bien sir !- d’apré li sa la ansèrv La Rényon sansa non ?

Lété nout devoir é nou la fé nout devoir. Pétète sa la pa ansèrv lo pèp rényoné, pétète ! Mé kan sé out dovoir i fo ou i fé ali konm nout parti épi bann démokrat rényoné la manifèst z’ot solidarité avèk bann pèp dan la lite. Kisoi bann vietnamien ! Kisoi bann zalzérien ! Kisoi bann pèp l’afrik di sid ! Kisoi ankor Mozambik, l’Angola, Guinée-kap vèr ! Kisoi ankor Kuba.
… Myé ksa, mi pans laba Mada, nou la fé in paryaz dsi l’avnir : dévlop la solidarité rant bann pèp l’oséan indien, dévlop l’antant, pou konstrui in l’union rantre nou. Konm i di in l’union gagnan-gagnan ! In forum zordi, pou fé domin, in lantant gagnan-gagnan pou bann pèp l’oséan indien.