Matant Zélida la ékrir Justin :
Mon shèr nové, mon spès salté,
Si mi konpran bien, bann rouj-de-fon lé kontan èk sa. Zot lé kontan an avoir in l’asanblé avèk in mazorité pou la gosh. Lé vré, na in mazorité la gosh dann Sénat, mé lo Sénat-la, sa i ansèrv pa gran-shoz sa ! Final de kont, sé bann dépité k’i kont plis... bann dépité épi gouvèrnman, sa na in bonpé pouvoir dan la Konstitisyon. Biensir, Sénat i pé fé son rodomon, mé in kou d’pate é i anvoy ali dormi. Konm di lo kont, i anvoy ali pous kanar dan la désant. Donkalor, la pa bézoin zéstikilé konm zot i fé, pars, pou roprann in l’éksprésyon bien koni, lo Sénat sé in tig an papyé : li fé la grimas, li pé mèm fé rouaou ! Gronyé, irlé, mé li mord pa. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Moin lé sir, la droite noré bien èm gard la mazorité dann Sénat. Li nora bien èm gard pou li so soi-dizan tig an papyé. Sirtou kèk moi avan lo z’éléksyon prézidan la Répiblik. Lé vré, la pa vré ? Di pa moin sa i afayi pa la postir Nicolas Sarkozy !
Arzout èk sa, Sénat-la, sa i pé anvoy bann misyon pou débisk in pé la vérité. La prèv, la pa Sénat mèm la vni fé in misyon La Rényon na poin si tèlman lontan épi la fé oir in pé la vérité ? La pa dovan Sénat Paul Vergès la prézant son loi dsi lo réshofman klimatik ? La pa a partir d’la la fé l’ONERC épi lo plan pou réazi kont modifikasyon lo klima ?
Armète la dsi, Sénat i pé modifyé in loi, in bidzé, é kan li vot kont in projé, é bin li vote kont, é gouvèrnman, li vé, li vé pa, i fo li tyinbo in pé kont.
Sirtou mon vyé matant, in n’afèr ou i gingn pa dizéré konm in zo an travèr zot gozyé, sé lo gran diskour Paul Vergès la fé dovan lo l’asanblé é tout, gosh konm droite la bate la min pou li. Sa in fyèrté pou nou, Rényoné !

Justin