Lo prézidan Sarkozy i sar koz dann télé zordi... A bon ? Pars li l’avé arète koz dann télé don ?
Moin, mi oi ali toulézour, é lé pliské rar ké li fèrm son také. Li sar koz déssi la réform rotrète. A bon ? Nana ankor in n’afèr pou di la dsi don ?.. La pa fine dir k’i sava raz la pinte bann travayèr. San règ lo problèm lo pèyman la rotrète dann dis-kinzan, byin antandi ! Donk, i sava pa koz la dsi !
Pétète i sar koz déssi lo razaz de pinte k’i atann anou dann lé dé-troizan k’i vyin. Koman i sava konomiz san milyar l’éro déssi la tète bann ti épi moiyin kolon, pars bidzé La France lé tro an dégréné. Sa ni koné sa ! Na in minis la fine komans sring anou avèk sa, épi nana ankor kat-sink moi pou antann sa toulézour-shak zour. Donk la pa la dsi li sava kozé. Sa i ansèrv de riyin !
In ! Mi antrovoi a popré. Li sava koz déssi lo trikmardaz Bettancourt-Woerts é konpagni. Mé kossa li sava dir ? Lé sinp li sava sèy fé pran anou noir pou blan, po d’shanm pou pla kouvèr, makaroni pou la bouzi. Ni koné manzé-la ! La pa promyé foi i sèrv anou in manzé konmsa, kaziman in gato mal-kui, san gou san santiman.

Justin