Zot I koné nana tout kalité proverb dann la lang kréol. In pé lé pli zoli ké d’ot ! Kan mi ékri sa mi pans provèrb moin la mark an-o la, sa in mark la solidarité. Moin la vi, souvan-dé fo, dann mon prop famiy in moun i pas é momomon i done ali in boushé manzé ; moin la vi sa dann d’ot famiy galman. Mi koné pa koman sa l’arivé mé sirman sa sé lo rézilta in gran péryod bann rényoné té i lite pou gingn z’ot manzé – konm koméla, é pliské koméla. Mi pans in provèrb konmsa sa i fo ni réspèk toultan ké ni gingn. Kosa zot i anpans ? Arien ditou ? fé travay bien z’ot koko ! fé bouy z’ot matyèr griz ! zot va oir ké rant-rant, ni pé z’ète, tazantan, dakor rantre nou.