La fièv la fine passé, lo kor l’apré rofé. Ou lé pa bien pou vréman, mé firamézir tout bann fonksion i armét an plas. Le kor i ropran favèr. Sé la guérizon ?
Le gro déga la semenn passé lé déyèr nou. Pèrsone i blok pi la rout, nana lésans, marshandiz dann komèrs, shantié i tourn, marmay i sava lékol. Tout i roul ron, alor ?
Malérèzman non ! Pars nana si tèlmann moun lé pa kontan : kou d’la vi la pa diminié, shomaz lé la ! Demoun mizèr i mank pa. Bann salèr i bouz pa, bann minima sosio non pli... Memm lakor la sign lindi, i kontant pa. Konm pétrol i arèt pa béssé, demoun i pans le pri lésans nora pi diminié in pé plis. Dis santime ? Le kont lé pa bon !
Azout èk sa, bann pétrolié i mète luil déssi d’fé. Zot i di demoun, par avans, k’i fo pa kont tro déssi premié désanm, vik la pa lèr pou pèr noèl passé... Donk, kont déssi, mé fié pa tro ! Anfin la kriz lé la ! Èl i domann arienk pou ar démaré !

La pa in guérizon...tou zis in rémission !

Justin