Pou kossa mi di sa ? Pars sèrviss komonikassion-la, la fé pass lo gouvèrnman épi sa shèf konm demoune la pèr késhoz. Pa la pèr zatanta :sa lé kontrolé dopi lontan. Non sak demoune i di banna la pèr, sé lo brui kiyèr kan i bate dsu lo do kasstrol . La mèm apèl sa in kastrolade.

Kossa in gran gouvèrnman konmsa, la pèr in kastrolade ? In kékshoz téi égziss pa La Rényon é i sortei sorte inporté sé zour-issi. Romarke bien issi ni inporte toute kalité la marshandiz é lé pa étonan nou la inporte lo brui kiyèr kan i bate dsi kastrol. In pé i di ziska sa sé in arm par déstinassion é sa i méritré mèm figuir an parmi dann la loi anti kassèr.

Sèryé ! Wala in péi, in gouvèrnman, sa néna in l’armé bandé, la poliss an poundyak, lé mèm dann lo G 7 é wala ké zot la pèr bande kastrolade... Mi sorte lir dsi méssyé Google, i paré lo minist l’intèryèr i vé ranplass lo shèf gouvèrnman. I paré li vé dovnir kalif la plass lo kalif..Mwin, pèrsonèlman, mi kroi pa, mé do toutan lo miniss l’intéryèr sa sé in léspèss konplotist, é lé possib-mi di sa sou lo kantrol Justin- lo ga la fé in plan... In sorte mwambutshu pou la totalité La Répiblik é sak ni oi koméla, sré parétil arienk lo pti zorèye koshon k’i dépass par l’trou néna dann goni.

Antanssion ! Si lo plan lé bien fé, konm lo mwambushu pou Mayotte, mi diré li pran dé risk-an promyé lo risk oir son plan foiré. Antouléka mwin néna linpréssyon lo kastrolade sa la fé dézorde la Rényon mé la antandi ziska loin é sa i fé mové zanr pou in gouvèrnman é si sa sé sinploman lo promyé étaz la fizé, alon méfyé lé z’ot pars sa lé riskab rotourn dsi lo kanonyé li mèm. Anfin dsi la baz lansman èl mèm.

A bon antandèr, salu !