Dsu kossa nou téi baz ? Dsu in miks avèk plizyèr lénèrzi : dolo, solèye, lo van, la mèr, la biomass, lénèrji volkan. Avèk sa, nou té sirésèrtin trape nout lotonomi énèrzétik an dis-kinzan é anpliss sa noré pèrmète anou soulaz noute balanss komèrsyal pou 700 milyon l’éro. In larzan dégajé pou mète dann nout révolissyon indistriyèl a vnir…
Kossa l’arivé, l’EDF épi gouvèrnman, avèk bande konpliss la Rényon la kass sa avèk lo kontantman la droite, lo bande transportèr, épi toute inn klik bande konplissité.

Donk ala gouvèrnman Macron — ké la fine pèrde sinkan pou la po patate — i kalkil fé trape anou noute lotosifizans énèrzétik. Mé pou bien amontr li lé déssidé, ala ké zot i anparl instal issi la Rényon in santral élékrtrik nikléèr modilèr é sa d’apré zot sé in solission.

Mé nou la pa bézoin sa, avèk lénèrzi prop ni pé gingn fé sa. La pa bézoin anparl anou lo rosiklaz an santral éléktrik avèk bande sou-marin réformé ossinonsa trafiké ou otroman. Noute plan lété fine fé, noute kalandriyé lété fine drèssé. Alor kossa zot i vé ankor ? Lèss anou avanss noute pion.

Sa lé konm lo train, nou té paré pou lanss sa. Alor plito ké ramass la ganm konm zot l’apré ramassé, i vo myé zot i koz ajeun, rézonab, plito k’a tor-an-tavèr — é konm demoune lé pa toussèl. Lé bu si zot i vé !

Garde zot santral nikléèr pou zot é lèss anou applik noute plan — A bon ékoutèr-salu.